آذربايجان معليملري و ميللي مسئله 

گونئي آذربايجانين سياسي، اقثصادي وضعيتني ني نظره آلديقدا اونون يئريني ايران دئييله ن يئرده و بوگونكو بولگه سل «قولوبال» دونيادا تعيين ائتمه يه چاليشديقدا دونيانين گليشميش «اينكيشاف ائتميش» اولكه لرينده ن نه قده ر فاصيله آچديغي نين شاهيدي اولوروق. بو هر بير وطنيني سئوه ن آذربايجانلي اوچون اوره ك آغريديجي اولسادا تعجب ائديله جك مسئله دئييلدير. . 
ايران دئييله ن يئر چوخ دالي قالميش اولكه لرده ن اولوب ، حاكمييتي ايسه تئروريست و گئريجي« فوندامنتاليست » بير رژيمدير. دونيانين گليشميش اولكه لري اونو نه حئسابا قويورلار ، نه ده كي دونيادا مثبت آد ـ سانا صاحيب دير. بئله بير وضعييت ده گونئي آذربايجان ميللتي دونيانين سرعتله گليشن ماكيناسي نين ته كرلري آلتيندا ازيلمه مه سي اوچون تكجه اوزو – اوزونو بو فلاكتده ن قورتارا بيله ر. البته بو ايشده آيدينلاريميزين ، او جومله ده ن معليملريميزين بوينونا بويوك وطيفه لر دوشور. 
اينسانلارين ايلك معليمي اوز آناسي و عائله سي اولموشدور. اوخويوب – يازماغي ، ائله جه ده چئوره سينده اولان اولوشوملاري « پديده لري» ، بيليملري «علملري» اويره نمك اوچونده مكتبه گئتمك زورونداديرلار. معليملريميز مكتبلي لره قئيد اولونانلارلا ياناشي اخلاق، تربييه و مدني لييي آشيلاييب ، اينسان سئوه رليك و وطنپروه رليك دويغولاريني جانلاندير ماليديرلار. اوشاغين اوزونو- كيملي ييني « شخصييتي ني» تاپماسيندا اساس عاميل اوز آنا ديلينده يازيب – اوخوماسي دير. فارس شوونيزمي نين مستملكه چيليك و اوز ايچينده اريديب « آســـــيميلاســـيــــــــيون»فارسلاشديرما سياستي بونا مانع اولور. آنجاق بونا ايجازه وئريلمه مه ليدير. بو حالدا آتا – آنالاريميزين و معليملريميزين بوينونا آغير ميللي بير وظيفه دوشور. اوزلري بو بويوك مسئولييتي درك ائتمه ليديرلر. 
عاليملر بونو تثبيت ائتميشلركي، اينسانلارين گليشمه چاغي نين ان موهوم دورو 6- ايله 12 ياشلار آراسيندادير. بو ياشلاردا اينسانلار اوز كيمليكلريني« شخصييتلريني » تاپارلار. بو ياشدا اوشاغين اوز آناديليني اويره نمه سي شخصييتي نين گليشمه سينده و گله جك حياتيندا اساس رول اويناماقدادير. بونا گوره ده بالالاريميز اوز آنا ديللريني اويره نمكله ياناشي آذربايجان كولتور و مدنييتي ايله ده تانيش اولماليديرلار. مكتبلر عين زاماندا گله جك عالي مكتبلرده اويره نيله جك بيليم و ايختيصاص ساحه لري نين تملي نين، پاياسي نين قويولدوغو يئردير. بوتون بونلاري نظره آلديقدا فارس شوونيزمي نين اوشاقلاريميزين اوستونده قويماغا چاليشديقلاري چدشيدلي منفي تاثيرلري خنثي ادتمك اوچونده معليملريميزين بوينونا دوشن وظيفه لر اولدوقجا چتين دير. بدله بير شراييطده آذربايجان ميللتي نين معليملريميزه اولان احترامي قات – قات اوستوندور. اونلارين امكلريني يوكسك ده يه رلنديرمكده دير. 
فارس شوونيزمي نين مستملكه چي سياستي نتيجه سينده بوگون معليملريميز مدني، سياسي و اقتصادي سيخيشديرمالارا معذوض قاليرلار. معاشلاري گونلوك هزينه لري قارشيلامير. يعني اونلارا گونلوك ائحتياجلارينا گوره معاش وئريلمير، چكديكلري زحمتلر ده يه رلنديريلمير. 
طبيعي ديركي ، وطنيميز آذربايجان فارس شوونيزمي نين مستملكه سينده اولماييب، مستقيل ، ميللي – دئموكراتيك حقوق دولتينه صاحيب اولسايدي.، معليملريميزده معنوي و اقتصادي باخيميندان داها رفاه ايچينده ياشايا بيليرديلر. هر ساحه ده اوز بيليكلريني قورخمادان سانسورسوز، باسقي سيز، آزادجاسينا اوز اويره نجيلرينه «شاگردلرينه» اويره ده رديلر. اجتماعي ساحه ده معليملريميز، عاليملريميز آذربايجان توپلوموندا «جامعه سينده» اوزلرينه لاييق يئري آلارديلار. اقتصادي سيخينتيلاري اولمادان رفاه ايچينده ياشارديلار. 
گليشميش دئموكراتيك اولكه لرده مكتبلي لر چوخ كيچيك ياشدان دئموكراتيك قايدا- قانونلاري اويره نيرلر، بو اوصوللارلا بويويوب بويا ، باشا چاتيرلار. بونا قارشيليق بيزيم مكتبلرده مكتبلي لره ديني فاناتيزم ، علم و بيليك يئرينه خبرچين ليك، بويوروقلا ياشاماغي تعليم وئريرلر. بئيين لرين يويوب، چيركين عمللره تشويق ائديرلر. مستملكه ده ياشايان ميللتيميزين معليم و اوستادلاري گونده ليك فشار – باسقي و قورخو – قده غه يه معروض قاليرلار .حتا اونلاري آذربايجانلي تورك اوشاقلارينا فارس ديلينده يعني يادلارين ديلينده درس دئمه يه مجبور ائديرلر. 
معليملريميز بو فاجيعه لرين ، مكتبلرده آذربايجانلي بالالارين نئجه اوزلرينه اوزگه لشديرمه سي نين، ايرانچي لاشديريلماسي نين ، فارسلاشديريلماسي نين جانلي شاهيديديرلر. معليملريميز بونلاردان ويجدان عذابي چكيرلر. او بيري طرفده نده اقثصادي بوحران ايچينده يانيب – ياخيليرلار. بوگون ايران دئييله ن يئرده هر بير عائله نين ان آشاغي سوييه ده ياشايا بيلمه سي اوچون 6-7 يوز مين تومن پول لازيمدير. بير صوره تده كي، اونلارين گليرلري بوتون بئشده بيري قده ردير. بونا قارشيليق رئژيم باشچيلاري نين ، تالانچيلارين ، گونلوك گليرلري نئچه مين تومندير. اونلار اولكه نين بوتون ميللي ثروتلريني چاليب ، چاپيب ، اوزلشديريب ، خاريجي بانك حئسابلارينا ياتيرديلار. گونلوك چوره يينه محتاج اولان رفسنجانيلر بوگون ميلياردلار دولارا صاحيب ديرلر. 
بو دانيلماياجاق حقيقتلرين ايچينده ياشاركن ، بيز آذربايجان ميللتي اوز باشيميزا چاره قيلمالي ييق. آذربايجانين بوتون اراضيلرينده ميللتينيز دينينده ن، عقيده سينده ن، سياسي باخيشيندان ، طبقه منسوبيتينده ن آسيلي اولميياراق آذربايجان آدلي وطنيميزين ، ميللتيميزين فارس شوونيزمي نين مستعمره سينده ن قورتولوشو، آزادليق و مستقيللي يي اوچون بيرلشمه لي ، باشلانان ميللي آزادليق و قورتولوش موجاديله سينه قاتيلماليدير. 
آذربايجانلي معليملريميز، اوستادلاريميزدا اوز صنفي حاقلاريني مدافعه ائتمكله ياناشي اولكه ميزين ، ميللتيميزين طالعينه لاقئيد ياناشماماليديرلار. 21- نجي يوز ايلين «عصرين» آستاناسيندا قول كيمي مستملكه چي تهران رژيمي نين بويوروقلاريني ايجرا ائديب، فارس شوونيزمي نين قوللوقچوسونا چئوريلمه مه ليديرلر. اوزلرينه قاييديب، كيمليكلريني درك ائديب ، ايمكانلاريندان يارارلانيب مكتبلي لره اوز آنا ديللرينده يازيب- اوخوماغي اويره تمه ليديرلر. ياد ديللريني ايكينجي پيلانا آلماليديرلار. معليملريميز اوز اويره نجيلرينه« شاگردلرينه» ميللي آزادليق و قورتولوش موجاديله سينده معليم و يولداش اولماليديرلار. اويره نجيلر ايسه اوز معليملرينه آرخا چيخمالي، مودافعه ائتمه لي ، اونلارين ان ياخين داياغي اولماليديرلار. تاريخده باشي اوجا ياشاييب، دونيانين آزاد ميللتلري نين يانيندا هميشه ليك يئر آلماغي ايسته ييريك سه ، يالنيز و يالنيز اوز ميللي وارليغيميزدان ، آنا وطنيميزده ن جسارتله ، غرورلا مودافعه ائتمه لي ييك . دوغما وطنيميز آذربايجاني فارس شوونيزمي نين اسارتينده ن قورتاريب، مستملكه حياتينا سون قويمالي ييق .
ياشاسين معليم و اوستادلاريميزين آزادليق ، مستقيلليك يولوندا آپارديقلاري ميللي قورتولوش ساواشي !